HABAGATNONG HINAGAWHAW: Paghandom

Dili ko buot handomon
kay kasingkasing ko daw kumoton
kon ako makahinumdom
niadtong dugay nang panahon
nga sa panumdoman lab-as pa gihapon,
kadtong adlaw nga masulob-on
kanus-a kalit mibiya ka sa dayon.

Ning adlaw sa kasumaran
niadtong imong pagtaliwan
maoy buot kong hinumdoman
ug kinasingkasing nga pasalamatan
ang imong talagsaong kaayo isip akong magulang
kinsa sa panahon sa kaalaotan kong nahisugamakan
mao kanakoy miagakay ug akong gisandigan.

Isip akong magulang, akong manoy, ikaw
sa pag-abag ug pagsibot kanako wala mohikaw
aron sa bag-ong yugto sa kinabuhing panaw
ako makapadayugdog nga dili magduhiraw
ug makasubay sa dalan ngadto sa bag-ong adlaw.
Unta, Noy, ikaw karon mapahiyomong naglantaw
sa akong mga kalamposang nahagdaw,
ug niini gipasalamatan ko ikaw.

(Kini ang akong gamay nga pahinungod atol sa ika-21 ka tuig nga kasumaran sa pagtaliwan sa
akong magulang nga si Dr. Angel Libre III.)

Eric S.B. Libre
11 Agosto 2022